За Нас

За Нас

Деца и Дигитална Безбедност е неформална едукативна платформа посветена на создавање побезбедна и поздрава дигитална средина за децата.

Овој веб‑сајт е креиран од двајца загрижени родители на две деца – момче на 7 години и девојче на 5 години (во моментот на креирање на сајтот). Ние не сме професионалци од областа на онлајн безбедноста, психологијата или образованието, туку родители кои секојдневно се соочуваат со предизвиците на модерното родителство. Сѐ поголемата достапност на паметни уреди до сѐ помлади деца ја сметаме за сериозна причина за загриженост и тема за која е потребна поголема јавна свесност.

Преку лично искуство, но и преку разговори и впечаток добиен од други родители, дојдовме до заклучок дека голем дел од родителите не се целосно свесни за опасностите и предизвиците што ги носи преголемата изложеност на децата на непроверени интернет содржини, видеа, игри и апликации. Токму ова беше главната мотивација за создавање на оваа платформа.

Нашата мисија е да им помогнеме на родителите, старателите, наставниците и децата подобро да го разберат дигиталниот свет и да го користат одговорно, безбедно и со самодоверба. Платформата има информативно‑едукативна цел и не претставува официјален или професионален сервис за советување или стручна помош.

Во време кога интернетот, социјалните мрежи и дигиталните уреди се неизоставен дел од детството, веруваме дека знаењето и свесноста се најсилната заштита. Затоа, преку практични совети, разбирливи објаснувања и внимателно избрани информации, се стремиме да ги приближиме темите како што се:

• онлајн безбедност и приватност

• сајбер‑насилство

• дигитален отпечаток

• безбедно користење на социјални мрежи и апликации

• здрави дигитални навики и баланс помеѓу онлајн и офлајн светот

Нашиот пристап е едукативен, поддржувачки и ненаметлив. Не целиме кон заплашување, туку кон разбирање и отворен дијалог – меѓу родителите и децата, но и меѓу училиштата и пошироката заедница.

Во иднина, планирана е соработка со стручни лица од различни области, како што се психологија, сајбер безбедност и наставен кадар, во моментот кога ќе пронајдеме поединци кои ќе сакаат доброволно и волонтерски да придонесат со своето знаење и искуство. До тогаш, содржините на платформата се базираат на родителско искуство, јавно достапни информации и добри практики.

Веруваме дека секое дете има право на безбедно дигитално детство, а секој родител заслужува јасни, практични и применливи насоки како да го поддржи своето дете во дигиталната ера.

Заедно градиме свесност.
Заедно градиме безбедност.